Nola jakin dezaket zer eskubide ditudan sortzen dudanaren egile gisa, Interneten ere?

Interneten ikus-entzunezko eta testuzko eduki ugari dago, eta ikasleen eskura erraz iristen dira. Ikasleek maiz erabiltzen dituzte eskola-lanetarako, txantxak egiteko edo sormena praktikan jartzeko. Horregatik, beharrezkoa da ikasleei egileen lanak behar bezala erabiltzea arautzen duten kontzeptuak azaltzea. Kontzeptu horiek ikasleek eurek sortzen dituzten lanei ere aplikatzen zaizkie.

Interneten zerbait sortzen dugunean —argazki bat, bideo bat, marrazki bat edo testu bat—, ez gara sormen-lan bat egiten ari bakarrik; balioa duen informazioa ere sortzen ari gara. Informazio hori beste pertsona batzuek ikusi, partekatu edo erabil dezakete, baina baita teknologiek ere, hala nola Adimen Artifizialak, pertsona askok sortutako edukietatik ikasten baitu. Beraz, garrantzitsua da ikasleek egile gisa dituzten eskubideak ezagutzea: horri esker, beren sorkuntzak nola erabiltzen diren erabaki eta mundu digitalean duten balioa babestu dezaketelako.

Ideia horretatik abiatuta, ikasleek ulertuko dute sorkuntza digital orok egile bat eta hari lotutako eskubide batzuk dituela, eta Interneten aurkitzen dugun guztia ezin dela libreki erabili. Era berean, lanen erabilera-baldintzak (lizentziak) identifikatzen eta egiletza errespetatzen ikasiko dute, ingurune digitalean modu arduratsu eta kontzientean parte hartuz.